Co je to chrōnowizor? Niy je to taki galantny fernzyjer we krzini ôd zygora. To je taki bŏjkowy gyryjt do spoziyraniŏ we prziszłoś. Nale wto pedzioł, co na takim chrōnowizorze niy idzie we przeszłoś wejrzić?
Tyn blog założōłech kejsik dŏwno, cheba we 2012 rŏku. Miołech tako idyjõ, coby szkryflać ô roztōmajtych tymatach, kere sōm dō mie interesantne, do przikłŏdu dŏwniyjszo elektrōniczno muzyka, sztuka retro abo jakeś bildy analogym zrobiōne. Nale skuli tygo, co jo bōł (tak po prŏwdzie dalij żech trocha je) wielgi leber, tōż na chyńci sie skōńczōło. Pōźnij znŏdłech sie jeszczy jednŏ pasyjõ; ślōnsko gŏdka a pisŏwanie we ślabikŏrzowym szrajbōnku. Dzisiej mie ôlśniōło; po jakymu tygo cuzamyn niy skuplŏwać?
Beztōż terŏz mŏcie ôkazyjõ sam być.
Chca coby tyn blog bōł takim placym, kaj sie mŏga trŏcha dychnōńć, przelŏć trocha swojich gyfilōw, poôsprawiać ô ciykawych tyjmach... A ku tymu robić sie ibōng we gŏdce.
Mianujã sie Pyjter, pochŏdzã ze Zŏbrzŏ, urodzōny 15 pażdziyrnika we 1992 rŏku. Interesujã sie muzykōm, zbiyrōm winylŏwe platy, CD, mōm pōłno starych radiōw, magnetofōnōw a inkszych maszin do suchaniŏ muzyki. Jeżech taki dyskōntowy audiofil; przajã jakości, nale szporujã kaj yno mŏgã. Planujã pŏstować sam roztōmajte rzeczy powiōnzane z mojimi pasjōma, wszyjsko ôpisujōnc pō naszymu. Zakłŏdōm, co niy bydã we Necy za popularny, nale wierza, co kejsik, możno za 100 lŏt, kedy naszŏ gŏdko bydzie już urzyndŏwōm gŏdkōm, wtoś znŏjdzie te moje wypŏciny a powiy; "tyn chŏp tworzōł po ślōnsku, pryndzyj jak to bōło mŏdne!"
Terŏzki piszã na Chrōnowizor, nale wto wiy, możnŏ zrobiã s tygo Cajtmaszina!
